K Sapdanga hovin Prime Minister Modi lokal tur dawngsawng tura sorkar inbuatsaihna thlirlet

by News Editor

Tualchhung News

ZORAM TODAY| 8th September, 2025: Vawiin khan Secretariat Conference Hall, MINECO, Aizawlah September ni 13-a Sairang Railway Station hawng a lo kal tur Prime Minister Narendar Modi lo dawnsawn dan tur leh hun hmanpui dan tur inpuahchahna thlirletna hun neih a ni.

K.Sapdanga, Home Minister chuan thutkhawm hi kaihruaiin Khilli Ram Meena, Chief Secretary chuan hmalakna hrang hrang sawi zauna hun a hmang a. Director General of Police, Principal Secretary, GAD, Commissioner & Secretary, PWD, Health & Family Welfare, Coorperation, Power & Electricity, Art & Culture, ICT, School Education, Horticulture, Planning & Programme Implementation, Information & Public Relations Department, North Eastern Frontier Railways leh mawhphurhna nei, Sawrkar department aiawhte an tel a ni.

Home Minister K. Sapdanga chuan India ram state dangte leh Mizoram thlunzawmna tur Rel kawng pawimawh tak hawng tura India ram Prime Minister lo kal tur chu tha taka dawnsawn a pawimawh thu a sawi a. Mizorama a cham chhunga hun hlawkthlak tak a hman theih nan, kalkhawmte chuan an mawhphurhna theuh, tha taka hlenchhuak turin a chah bawk a ni.

Vawiin thutkhawm ah hian Lengpui Airport, Sairang Railway Station, Thuampui Helipad leh Aizawl Lammual-a venhimna, chawlh hahdamna hmun, inkalpawhna tha leh inbiakpawhna, thutna leh Medical duty ruahman dan en ho a ni a. Prime Minister hmuha phochhuah tur thil chi hrang hrang buatsaihte en ho a ni bawk.